Компанијата ОКТА донесе одлука до крајот на март да обезбеди попуст од два денара по литар за дизел и бензин, за трговците кои набавуваат горива од компанијата. Велат дека овој потег доаѓа по зголемените количини гориво кои биле обезбедени преку продуктоводот „Вардакс“. Но, од нафтената компанија „Макпетрол“ сметаат дека намалувањето на цените од 2,5 денари (со ДДВ) за литар на нафтените деривати од страна на ОКТА не е доволно и не го решава проблемот кој го налага моменталната ситуација.
„Од утре, па до крајот на месецот, воведуваме попуст од два денара за литар дизел и бензин за оние големопродажни и малопродажни трговци коишто ги набавуваат своите горива од ОКТА. На тој начин, ние всушност им овозможуваме на овие компании понатаму да ја пренесат оваа придобивка кон потрошувачите. Сепак, мораме да нагласиме дека малопродажните и големопродажните трговци со горива ја задржуваат својата целосна слобода самостојно да ги утврдуваат продажните цени на горивата“, изјави Димитриос Пасхос, главен извршен директор на ОКТА АД – Скопје.
Од нафтената компанија „Макпетрол“ предупредуваат дека со оглед на состојбата, се очекува цените на суровата нафта и понатаму да растат, а тоа значи дека трговците и натаму ќе бидат принудени да работат со загуби. Посочија дека ОКТА и досега им продавала по цени повисоки од малопродажните.
„Имајќи предвид дека добавувачот во изминатиот период продаваше по многу повисоки цени од малопродажните регулирани цени од страна на РКЕ и остваруваа профити, додека трговците на мало работеа во загуба, но не ги затворија своите продажни објекти, за очекување беше дека ќе се добијат повисоки дисконти во набавната цена“, реагираат од „Макпетрол“.
Првиот човек на ОКТА на денешната прес-конференција во министерството за енергетика, не одговори конкретно на прашањето дали на трговците им продавале по цени повисоки од малопродажните и колкава е разликата што ја оствариле во овој период?
„Сите наши напори во овој период е како прво да одржиме стабилност на понудата. Од друга страна, да обезбедиме соодветна поддршка за потрошувачите. И токму затоа сме денеска овде“, одговори Пасхос.
Премиерот Мицкоски денеска најави какви мерки ќе бидат преземени од Владата, ако кризата продолжи и засили ценовниот удар.
„Ќе одиме со намалување на зафаќањето на данокот на додадена вредност од 18 на 10 проценти. Па имаме уште една мерка, потоа од 10 на 5 проценти. Но, тоа ќе зависи од цената како ќе се движи. Сега верувајте дека имаме жесток притисок од граѓаните од соседните држави во пограничните места на југ, на запад и на север, каде што доаѓаат да полнат гориво, бидејќи за 30, 40, 50 центи по литар е поевтино кај нас отколку кај нив“, премиерот Христијан Мицкоски.
Но, од „Макпетрол“ посочуваат дека како најдобро решение за надминување на проблемот за сите засегнати страни вклучувајќи и граѓаните, е замрзнување на набавните цени на нафтените деривати, а со тоа и малопродажните цени, како што е пракса во регионот. Додаваат и дека сè уште го чекаат официјалното известување од добавувачот ОKTA за намалувањето на цената.
Петар Догов