Претседателот на Стопанската комора на Србија, Марко Чадеж, нагласи дека директната штета од блокадите на премините и извозот од целиот Западен Балкан изнесува околу 100 милиони евра дневно. Тој утрово го посети граничниот премин Батровци, каде што повеќе од 50 камиони го блокираат товарниот сообраќај.
-Срамно е кога станува збор за извоз на стока. Треба да се додаде дека секоја производствена компанија има казни и пенали за неиспорачана стока помеѓу 10.000 и 50.000 евра дневно. Има околу 10.000 компании што извезуваат само од Србија во ЕУ, и поради тоа може да се достигнат навистина големи бројки, изјави Чадеж, пренесоа српските медиуми.
Тој додаде дека сегашната криза со снабдување е предизвикана од нефлексибилноста на европската бирократија.
Бугарските транспортни компании исто така се жалат на големи финансиски загуби бидејќи мораат да користат алтернативни патишта низ Романија поради блокадите на граничните премини со Србија, Босна и Херцеговина, Црна Гора и Македонија. Тоа како што велат го продолжува нивниот транспорт за 500-600 километри до европските дестинации.
На граничните премини со Македонија, како „Врашка Чука“, „Брегово“ и „Ѓуешево“, се ограничува сообраќајот за возила над 3,5 тони, додека премините со Србија се блокирани за тешки товарни возила.
Состојбата ќе се следи внимателно, а бугарските институции најавуваат разговори со транспортните здруженија и Европската комисија за координација и можни решенија.