Семејната фирма на директорот на Службата за општи и заеднички работи (СОЗР), Ивица Томовски добила вкупно 161 тендер во вредност од 5,3 милиони евра од државни институции и општини водени од ВМРО-ДПМНЕ, обвинуваат од СДСМ чиј антикорупциски тим, што го најави лидерот Венко Филипче, денеска објави нова т.н. „бомба“.
„Ама за старата банда не се доволни посредници од надвор. Таа е гладна, ненаситна, бизнисот мора да го тераат лично и од дома, од фамилијата. Денеска објавуваме нов скандал, нова бомба! За тоа кој и како „чисти“? – Сите патишта водат до Ивица Томовски и СОЗР. Не чисти СОЗР, „чисти“ семејната фирма на Томовски“, рече членот на ЦО, Александар Саша Димитријевиќ од партиската говорница.
Димитријевиќ притоа објави конкретни податоци.
„Од државни институции и од општини, водени од ДПМНЕ, семејната фирма на Томовски која го менува името добила: неверојатни 5 милиони и 360.000 евра или вкупно 161 тендери. Тоа се речиси 5,5 милиони евра! Пари на граѓаните!“, истакна Димитријевиќ.
Дополнително, потенцира тој, „со доаѓањето на ВМРО-ДПМНЕ на власт, бизнисот на фамилијата Томовски експлодирал“.
„Семејната фирма на Томовски ја зголемила својата деловна дејност за 306%. И тоа само во 2024 година. Случајно, им тргнало чистењето на буџетот“, нагласи Димитријевиќ, според кого истата фирма во тековната година веќе добила 10 нови тендери од речиси половина милион евра.
Тој потенцита дека сопственик на „Сити логистик“ во моментот кога е основана е Витомир Томовски од Струга, татко на Ивица Томовски, а управител Слободан Кутановски, нивни близок роднина. Потоа се менува името на фирмата – Сити аутсорсинг. Иста адреса, ист единствен матичен број на субјект, само со друго име.
С.Д.