Заврши здравствениот скрининг на жителите од Трубарево кој теренски го спроведуваа лекарски тимови од Клиниката за Пулмологија по пожарот од 13 ти септември во центар за селекција на отпад каде гореа опасен електронски отпад и литиумски батерии. Интересот на граѓаните голем, за два дена пунктовите ги посетиле над 200 луѓе. Од вкупниот број прегледани, 19 лица се упатени на дополнителни испитувања на Клиниката за пулмологија, поради хронични заболувања за кои подолго време не направиле контроли. Прегледите вклучуваа клинички преглед, мерење на пулс, сатурација и проценка на витален капацитет. Пулмолошките тимови детектирале симптоми како потешко дишење, сува кашлица и стегање во градите кај дел од пациентите. Дополнително, биле идентификувани и случаи со висок крвен притисок, кои се советувани да побараат понатамошна нега од своите матични лекари. Министерството најави продолжување на ваквите активности и следење на здравствената состојба на жителите во овој регион. Предвидени се уште два вакви скрининга, на три и на шест месеци со цел да се следи ситуацијата со здравјето на граѓаните на подолг рок и евентуалните здравствени нарушувања кај граѓаните во големото загадување. Скрининг за пожарникарите кои го гаснеа опасниот по здравјето пожар се уште не е закажан.
