Собранието во последен момент изгласа измени на Изборниот законик со кои се предвидува можност, ако во исто време се одржуваат повеќе видови на избори, една партија или коалиција да има ист реден број на ливчето на сите видови избори.
Измените ќе важат и на овие претседателски и парламентарни избори. Овие измени беа предложени од пратениците Никола Мицевски, Мартин Костовски и Арбер Адеми, од ВМРО-ДПМНЕ, СДСМ и ДУИ. За предлогот гласаа 75 пратеници, немаше против или воздржани.
Тоа значи дека истиот реден број што ќе го имаат кандидатите на претседателските избори, може да го имаат и партиите или коалициите кои ги предложиле овие кандидати, на парламентарните избори. За да го преземе редниот број треба писмено да ја извести Државната изборна комисија.
ДИК со ждрепка веќе го утврди редниот број на кандидатите на претседателските избори, па сега партиите што ги поддржуваат ќе може да го преземат истиот реден број и на парламентарните избори.
Пратениците по скратена постапка донесоа и измени на Законот за буџети, со кој се утврдуваат коефициентите за плата на раководителите и аналитичарите во Стручната служба на буџетскиот совет.
Срѓан Стојанчов