Тројца беа приведени, за двајца беше одреден куќен притвор – но, докази за убиство на 67-годишниот матичен лекар во Железара, сѐ уште не се обезбедени.
Јавниот обвинител нема да предложи судот да определи нови мерки за претпазливост за лицата кои беа задржани, во врска со овој настан.
Ова е најновата информација од Обвинителството, по извршените вештачења во Институтот за судска медицина.
„Со преземените дејствија од МВР и извршените вештачења од Институтот за судска медицина, не се обезбедени докази кои даваат основано сомнение дека лицата лишени од слобода се сторители на кривичното дело. Министерството за внатрешни работи, во координација со Основното јавно обвинителство Скопје, продолжува да презема дејствија за идентификација на сторителите на кривично дело“, велат од Јавното обвинителство.
Убиството на 67-годишниот лекар, на паркингот пред Поликлиника „Железара“ веќе цела недела е обвиткано во мистерија. Трагите од крв и паркираното возило на човекот беа сѐ што надлежните успеаа да пронајдат на лице место.
Оттогаш па до денес преземени се над 20 истражни дејствија и прегледани над 50 камери.
Според првичните информации, на телото на лекарот имало девет убодни рани.
Но, мотивите за убиството сѐ уште се длабоко затскриени. Пред два дена, министерот за внатрешни работи Панче Тошковски кажа дека истите не се поврзани со дејноста на докторот.
Лекарот бил убиен минатиот четврток. Безживотното тело го нашле неговите синови, откако тој неколку часа не се враќал дома, по завршување на смената на работа.
Потоа, лекарите од Итната медицинска помош само констатирале смрт.
Петар Догов