Претседателскиот кандидат на албанската опозиција Арбен Таравари вели дека недоразбирањата на косовскиот премиер Албин Курти со Вашингтон нема да влијаат на нивните односи со САД. На прашањето како поддршката од Курти за албанската опозиција во Македонија, ќе влијае врз нивните односи со САД, Таравари вели дека имаат фантастични односи со меѓународната заедница.
„Ние имаме фантастични релации со сите амбасади на сите држави во Македонија, и така и ќе продолжи. Тоа што се недоразбирања во Косово, јас не знам, меѓутоа господинот Курти има огромно влијание во Македонија. Тој е рол модел на еден политичар, искрен и некорумпиран. Ако постои таков на Западен Балкан, мислам дека Курти е најдобар пример за тоа“, рече Таравари, одговарајќи на новинарско прашање.
Заменик-помошникот државен секретар на САД за Западен Балкан, Габриел Ескобар, во интервју за Радио Слободна Европа, рече дека има „многу разочарување“ од косовската Влада на Самоопределување, „не само во Вашингтон, туку и во Брисел, Рим, Берлин и Париз“.
Косовскиот премиер го поддржува опозицискиот Европскиот сојуз за промени во Македонија, чиј кандидат е Таравари, а поддржувачи на владејачката партија во Косово, Самоопределување, ќе се најдат на кандидатските листи на албанската опозиција за претстојните парламентарни избори во Македонија.
Срѓан Стојанчов