Легендата на Манчестер јунајтед и англиската фудбалска репрезентација Сер Боби Чарлтон почина утринава на 86-годишна возраст, објави неговото семејство.
Чарлтон важеше за еден од најдобрите, ако не и најдобар англиски фудбалер на сите времиња. Постојано беше на натпреварите на неговиот сакан Манчестер јунајтед, но изминатите години се бореше со деменција.
Тој за „црвените ѓаволи“ настапи на 758 натпревари во вкупно 17 сезони и постигна 249 голови. Со Јунајтед освои три титули шампион на Англија, еден ФА Куп и еден трофеј во Купот на шампионите во 1968 година.
Со англиската репрезентација го освои Светското првенство на домашно тло во 1966 година, а на 106 настапи запиша 49 голови. Долго време беше најдобар стрелец во историјата на „Гордиот албион“ пред Вејн Руни да го сруши неговиот рекорд во 2015 година.
Јужната трибина на стадионот „Олд Трафорд“ го носи неговото име, а има и своја статуа пред стадионот на Манчестер јунајтед, каде покрај него овековечени се и Џорџ Бест и Денис Ло.