БЕСА, Алтернатива и Демократско движење бараат спојување на редовните претседателски со предвремени парламентарните избори. Терминот треба да се договори на лидерска средба, смета Здружената опозиција на Албанците и барањето го адресира до Владата.
-Имајќи ја предвид економската ситуација во државата и трошоците за организирање на изборите, инсистираме да имаме еден термин за претседателски и парламентарни избори. Редовниот термин е многу близу и не треба да се прават дополнителни трошоци за да парламентарните избори бидат три месеци покасно, изјави претседателот на БЕСА Билал Касами.
ВМРО ДПМНЕ и Мицкоски се подготвени да појдат на лидерска средба кај спикерот Талат Џафери во било кое време. Очекуваат и другите политичари да покажат зрелост.
-Јас сум подготвен да појдам. Да ги аргументираме позициите, да ги фиксираме датумите затоа што ни претстојат претседателски избори, парламентарни избори, техничка Влада, а треба и едните и другите да се распишат… Можеме да дојдеме во еден тесен рок и не би сакал тој рок дополнително да создаде тензија и дополнителна политичка и уставна криза, рече претседателот на ВМРО ДПМНЕ Христијан Мицкоски..
Премиерот Димитар Ковачевски не гледа потреба од лидерска средба. Смета дека Уставот и законите јасно ги пропишуваат роковите за редовни избори и дека не треба неколку лидери да се договараат како да ги заобиколат институциите. Талат Џафери деновиве порача дека е подготвен да свика лидерска средба, но само ако сите лидери потврдат присуство во термин не подоцна од Нова Година. Уставниот календар говори дека вториот круг од претседателските и редовните парламентарни избори може да се совпаднат само во периодот од 5-ти мај, кога е Велигден, до 8-ми мај. Секој термин порано, вели Џафери, би значел предвремени избори, поинаква динамика и други ризици. За да се избегнат верските празници и дополнителните трошоци, Џафери остава можност изборите да не бидат во недела туку во друг работен ден потоа.
Соња Николовска
