Работната група за уставни измени нема рок за подготвување на текстот на иницијативата. Ќе работи интензивно, но прво мора да изготви Деловник за работа. Ваков став изнесе претседателката Маргарита Цаца – Николовска по првата работна седница. Дваесет и тројцата членови не успеале да ги усогласат сите детали за Методологијата и начинот на кој ќе функционираат, па задутре продолжуваат на истата тема. Кога ќе го утврдат Деловникот, ќе биде појасна динамиката на нивната работа, соочувањето на различните предлози и усогласувањето на партиските со експертските ставови. Но, приоритетно е значењето на оваа интервенција за европскиот напредок на земјата.
Иако Владата не и даде временска рамка на Работната група, очекува од неа брзи резултати. Вчера, вицепремиерот за евроинтеграции Бојан Маричиќ изрази уверување дека текстот на иницијативата ќе биде готов за неколку дена или за неколку недели. Амбициозниот план предвидува до крајот на месецот текстот да биде објавен, а веднаш потоа да почне јавната расправа и да се испрати од Владата во Собранието.
Во Работната група членуваат 10 експерти по уставно право и поранешни судии во Уставниот суд, 10 партиски претставници и по еден од кабинетите на претседателот, МНР и Секретаријатот за европски прашања. ВМРО ДПМНЕ нема свој претставник и цврсто стои на ставот дека во овој парламентарен состав – нема да има уставни измени.
Соња Николовска