Реформи во образованието за побезбедени ученици – за ова сите се согласуваат, но процесот не е едноставен. Растргнати помеѓу брзите решенија и долгорочната стратегија, надлежните ќе мора да одлучат како да фатат чекор со новото време, но и мерките да бидат ефикасни – анализираат од Сојузот на средношколци. Оттаму подготвиле неколку предлози и истите ќе им ги предочат на образовните власти. Се предлага отворена телефонска линија и профили на социјалните мрежи, нов протокол, засилено полициско обезбедување на училиштата како и тестови за педагозите и психолозите.
Вчера, стручни лица – педагози, психолози, социолози, заедно со министерот за образование седнаа на состанок. Поразговараа како да се подобри безбедноста во училиште и како да се справиме со меѓуврсничкото насилство. Овој проблем постои и тоа е констатирано, но малку се зборува. Табуата постојат и стравот од стигматизација сѐ уште е силен.
И од Сојузот на средношколци, но и сите засегнати страни изразија оптимизам дека овие состаноци во МОН нема да бидат само исклучок и про-форма, по случувањата во соседна Србија. Министерот наредил да се отвори електронска адреса за пријавување насилство, а другите детали од првиот состанок ќе бидат откриени во следниот период.
Петар Догов
