Пратеникот од редовите на ВМРО – ДПМНЕ Јаревски му одговори на првиот вице премиер Артан Груби, кој вчера ја обвини опозицијата дека шири лажни вести за изградбата на Коридорите 8 и 10-д и дека со блокадата во Собранието само ја поскапуваат и пролонгираат изградбата но, не може да ја запрат.
Јаревски денеска вели дека Бехтел и Енка во Србија учествуваше на тендер со дупло поевтини суми од тука.. Според него во Србија имало тендер, а кај нас договорот е склучен во четири очи.. Километар автопат во Србија вреди 7 милиони евра, а во Македонија 20 милиони евра, вели Јаревски.
И денеска на ваквите обвинувања одговори првиот вицепремиер Артан Груби. Тој на својот Фејсбук профил и денеска напиша дека граѓаните не треба да веруваат на лагите на ВМРО – ДПМНЕ.
– Не дозволете да ве лажат: ништо не може да ја спречи изградбата, само ја прави поскапа и подолга. Блокадата на ВМРО и Левица може да ги чини граѓаните над 100 милиони евра и две години подолга изградба на автопат. Пратениците одлучуваат дали автопатите ќе се градат побрзо и поевтино или побавно и поскапо – напиша Груби на фејсбук.
Телма веќе информираше дека Моравскиот коридор во Србија во должина од 112 километри кој што го гради фирмата Бехтел – Енка е врз основа на договор тежок 800 милиони евра, додека пак автопатите во Македонија во должина од 109 километри ќе чинат милјарда и триста милиони евра.