Не стивнуваат реакциите по вчерашното разрешување на претседателката на Судскиот совет, Весна Дамева. Професорката на Правниот факултет, Ана Павловска Данева, во објава на Фејсбук, коментира дека Дамева е разрешена спротивно на Закон и деловник. Таа предлага „Владата, која има свој претставник во Судскиот совет, Претседателот на државата, кој, исто така, има свој претставник, Врховниот суд како највисока судска инстанца, правните експерти, Уставниот суд, јавно да го осудат, како што, вели преседанот со разрешувањето на претседателката на Судски совет.
Професорката, исто така, сугерира дека „Службен весник“ не треба да ја објавува одлуката донесена во незаконита постапка, а таа треба да се оспори во управен спор со барање за изрекување на времена мерка од страна на Управниот суд.
Со реакција на ФБ се огласи и адвокатката Сузана Јошевска Анастасовска. Таа во својот коментар го опиша разрешувањето на Дамева како драма во Судски совет со што се задава нокаут на веќе паднатото судство на колена
„Ако претседателка на ова тело може да се разреши како да е претседателка на куќен совет, надвор од секоја процедура, со насилие и пуч во телото, секој судија треба да се запраша дали овој состав треба да одлучува за неговата одговорност и напредување во кариерата. И како би бил заштитен тој како судија???“, се вели меѓудругото во нејзиниот коментар.
Дамева беше на чело на Судскиот совет од декември минатата година и ја наследи Црвенковска која сама си даде оставка и рече дека трпела хајки од судско-бизнис елитата. Според најавите, денеска на седница ќе се бира нов претседател на Судски совет.