Демократскиот сојуз (ДС) инсистира на ревизија од Државниот завод за ревизија над досегашните активности во врска со изградбата на коридорите 8 и 10Д.
„Прво, дали потпишаниот Договор со „Бехтел и Енка“ е во согласност со позитивните законски прописи на Македонија. Второ, дали фирмите за консултации и надзор се избрани во согласност со законските решенија“, прашуваат од ДС.
Од ДС бараат ревизорскиот извештај да биде доставен до сите пратеници, но и повлекување на предложените измени на девет закони и нивно доставување до Собранието во редовна постапка.
„Во меѓувреме, постигнатиот Договор со „Бехтел и Енка“ да се достави до сите пратеници и до јавноста, за да може да се направи анализа и стручна експертиза. Доколку Владата и натаму инсистира на тоа дека договорот е класифициран, за тоа да се произнесе Дирекцијата за безбедност и класифицирани информации. До завршување на сите овие претходни активности, да се стави мораториум на имплементацијата на овој стратешки проект“, бараат од ДС.
Партијата ги отфрла, како што вели, тезите на власта дека тие што наводно го оспоруваат овој проект се против САД и ЕУ.
„Јавно соопштуваме дека има сомнежи за корупција од големи размери и сè додека не се обезбеди целосна транспарентност и ревизија на досегашните активности, нема да поддржиме законски измени кои се резултат на веќе потпишаниот договор, за кој граѓаните треба да платат околу две милијарди евра“, истакнуваат од ДС.