Изјава што министерот за надворешни, Бујар Османи ја даде на 27 октомври лани за бугарски медиум е причина за тужбата за навреда од Македонското меѓународно движење за човекови права и неговиот претседател Бил Николов кои го финансира здружението „Никола Вапцаров“ во Благоевград. Во друга изјава, здружението го нарекол сомнително објаснуваше адвокатот на тужителите на денешното прво, подготвително, рочиште во Граѓанскиот суд.
„Османи како претседавач со ОБСЕ оди по светот во заштита на човекови права, а тука омаловажува и навредува здружение кое се бори за малцински права“, смета адвокатот на Николов и Македонското меѓународно движење од Канада кои бараат отштета од министерот од 10.000 евра.
Османи негира дека ги навредил. Тоа ќе го објаснува на 29 мај, кога ќе дојде на распит во Граѓанскиот суд. Неговото присуство денеска не беше задолжително, а неговиот адвокат објаснуваше дека немал намера никого да омаловажи, најмалку тужените. Очекува судот да ја одбие тужбата како неоснована и непоткрепена со факти и докази.
„Иако е функционер, Османи има право да дава мислење особено за здруженија и граѓани кои делуваат јавно“, смета адвокатот.
Адвокатот на тужителите го повика Османи ако сака да критикува да си даде оставка и како обичен граѓанин на да критикува, а не да навредува и од позиција на моќ да прогласува сомнителни лица и антидржавни елементи. Адвокатот на Османи, пак, рече тужителите бараат отштета, а не доставиле медицинско вештачење со кое би се утврдила душевна болка од повреда на чест и углед.
Елена Ивановска Мукоска