Сет мерки за сајбер-заштита на државните институции произлегоа од денешната седница на Владата.
Вештите хакери веќе допреа до чувствителни податоци од Фондот за здравствено осигурување и успешно ги преземаа, а сега ваквите работи ќе се превенираат со итни мерки.
Општи работи, како обука за вработени административци и сајбер-безбедносна проверка на веб-апликации, се дел од работите кои на владината седница беа препознаени како чекор плус кон зголемена заштита.
„Владата ги задолжи органите на државната управа, а им укажа на институциите кои не се органи на државна управа, да определат лице одговорно за информациска безбедност, со цел навремено пријавување на инциденти. Сите вработени задолжително да се регистрираат и да завршат обука за сајбер безбедност за вработени во јавна администрација“, пишува во дел од владиното соопштение.
Во меѓувреме, двајцата директори на ФЗО, Магдалена Филиповска – Грашкоска и Фатон Ахмети, за јавноста сѐ уште се достапни само со фотографија и биографија на веб-страницата на Фондот. За утре е најавен брифинг со медиумите, со кои нивната досегашна комуникација е сведена на минимум.
Директорот Ахмети е на пат во САД и надлежностите ги пренел на друго лице, со оглед на тоа дека сите одлуки во ФЗО одат со врзани потписи. Телма побара одговори од Владата – дали знаат за отсуството на Ахмети и дали е побарано од него да го прекине престојот во САД, со оглед на сериозниот хакерски напад на Фондот.
Одговори сѐ уште нема, а неизвесно е и каква одговорност ќе има за двајцата директори откако имаше негативен извештај за нивната работа од Државниот завод за ревизија.
Петар Догов