Доцна синоќа полициска патрола била протерана од скопско Арачиново од вооружена група, откако претходно се обидела да запре возило кое било управувано од лице што не поседувало документи. Лицето се здало во бегство, а откако патролата тргнала по него била пресретната од други лица под сомнеж дека дел поседувале и оружје. Полицјаците, соочени со притисок го напуштиле местото. Засега остануваат неодговорени прашањата, кои се лицата од кои се исплашиле полицјаците. МВР, истражува. Но, појдовна точка е единствената пријава од тој реон, односно сосема спротивна од информациите на медиумите.
Изворите на Телма информираат и дека случајот не бил пријавен кај надлежните, како и дека ова не е единствен ваков настан. За овие сомнежи со свои наводи се огласи и опозицијата.
Ова е тежок скандал, за којшто нема оправдување, ниту криењето помага. Вооружени лица блиски до власта, влегле со закани во полициско одделение во Арачиново, а четворица полицајци добиле наредба од претпоставен да се повлечат од полициски пункт, и од Арачиново да се повлечат во Гази Баба, само затоа што е направена контрола, сопреле возило, без валидни документи, рече Наум Стоилковски од ВМРО-ДПМНЕ, која бара оставка од Спасовски.
Вклучена е и внатрешната контрола при МВР која треба да ги распраша полицајците кои синоќа биле, или не биле, на пункт во Арачиново. Но, одговор од МВР треба да стаса и кого тие застанале и легитимирале во возило. Опозицијата, пак, освен одговори очекува оставка од министерот за внатрешни работи Оливер Спасовски.
Павле Беловски