Учениците веќе втора недела се на распуст, но доказ за успехот постигнат во изминатата учебна година неизвесно е кога ќе добијат.
Родители на основци од училишта во Центар информираат дека закажани термини за доделување на свидетелства се одложуваат на неодредено.
Во просветните кругови го лоцирале проблемот и бараат одговори.
Во меѓувреме, учениците од деветто одделение и оние од четврта година средно веќе го добиле овој документ и тоа во изминатите две недели.
„Кога станува збор за свидетелствата од прво до осмо одделение и свидетелствата од прва до трета година средно, тие сè уште не се доделени во училиштата. Голем дел од колегите се пожалија дека доцни доставата на свидетелства и дека се повторува оваа лоша пракса којашто ја имаше и лани. Со тоа се одложуваат и оние обврски коишто ги имаат просветните работници на крајот на учебната година, односно, да ги запишат свидетелствата и да ги доделат на учениците“ изјави Томислав Гиевски, претседател на Независниот синдикат за образование и наука.
Пристапот на главните институции коишто го водат ресорот Образование е несериозен, критикува Гиевски и ги прозва да водат повеќе грижа за учениците и за наставниците.
Во меѓувреме, надлежните молчат.
Телма упати прашања до Бирото за развој на образованието кое е надлежно за набавка на свидетелства, но оттаму не одговараат кои се причините поради кои во одредени училишта се одложува доделувањето на истите.
Нема ниту одговор – дали е распишан тендерот и дали се обезбедени овие документи.
Сличен проблем имаше и лани, а тогаш како главна причина беше наведена пандемијата и вонредните услови за работа.
Петар Догов