Околу 8.000 британски војници одат во Источна Европа за да учествуваат во воените вежби што се одржуваат поради руската агресија.
Според Скај њуз, ова е едно од најголемите распоредувања на британски војници од Студената војна, а војниците ќе бидат распоредени во повеќе земји, од Финска до Македонија.
Покрај војниците, летово на бројни локации ќе бидат испратени и десетици тенкови и повеќе од 100 оклопни борбени возила.
Целта е да се одвратат Русите од можна агресија на Балтикот
На британските вооружени сили ќе им се придружат десетици илјади војници на НАТО и сојузниците, вклучувајќи ги Данска, Исланд и Норвешка.
Министерството за одбрана соопшти дека планираните вежби ќе ја подобрат способноста на британските и финските трупи да работат заедно за да ја одвратат руската агресија во Скандинавија и балтичките земји.
Секретарот за одбрана Бен Валас рече дека овој потег ќе покаже солидарност и сила.
„Безбедноста на Европа никогаш не била поважна. Овие вежби ќе покажат како нашите трупи ги здружуваат силите со сојузниците и партнерите за да покажат солидарност и сила во едно од најголемите заеднички распоредувања на војници од Студената војна“, рече Валас.