Војната во Украина е „стратешка катастрофа за Русија“ и „стратешки неуспех за Путин“, изјави портпаролката на Белата куќа, Кејт Бедингфилд. Таа рече дека сега има „непобитни докази“ дека војната, која трае повеќе од еден месец, не го постигнала она на што се надеваше рускиот претседател Владимир Путин, што го поттикна Кремљ да ги „редефинира“ првичните цели.
„Применетите санкции нанесуваат екстремни трошоци за руската економија“, рече Бедингфилд, и најави дополнителни санкции за руските технолошки компании кои ја овозможија војната на Путин.
„Ќе ги спречиме да набавуваат западна технологија и да избегнат остри санкции. Исто така, ќе ги прошириме санкциите на дополнителни сектори на руската економија важни за Путин, вклучително и секторите за авијација, поморство и електроника“, додаде таа.