Лавовите и мечките се само дел од дивите животни кои се оставени сами да се грижат додека луѓето во Украина бегаат од руските сили, велат активистите за правата на животните, пишува Би-би-си.
Се проценува дека има илјадници диви животни во приватните домаќинства во Украина, вклучувајќи лавови, тигри, мечки, волци, крокодили и питони. Во Украина е легално да се купат овие животни, под услов да се одгледуваат во заробеништво.
Жената пронашла напуштена лавица
Едно од животните што останало само на себе е двегодишната лавица Рура.
Азија Серпинска (78) раководи со едно од најголемите засолништа за кучиња во Украина. Кога шталата на нејзиниот сосед во Хостомел, во близина на Киев, се запали на 2 март по напад со руска граната, Азија втрча внатре да ги ослободи птиците, зајаците и лисиците од нивните кафези. Но, во подрумот нашла и лавица.
„Никој не мораше да ја храни и изгледаше прилично немирно и исплашено, па почнавме да и даваме храна и вода“, вели Азија.
Неизвесната иднина на напуштените животни
Силно гранатирање ја спречи Азија да излезе од дома девет дена, а во меѓувреме беа поставени мини околу кафезот на Рура.
„Големото прашање е што ќе се случи со илјадниците диви животни во приватно заробеништво за време на оваа војна“, рече Ирина Коробко, активистка од Украинското здружение за заштита на животните.