Професионален војник на АРМ починал денеска во Косово каде бил на задача во рамки на мисијата КФОР. Војникот се наоѓал во Пеќ каде му се слошило и со американски хеликоптер е префрлен во болница во Приштина каде починал и покрај пружената лекарска помош.
Претставници на Армијата првин ја известиле сопругата и семејството на 44-годишниот професионален војник. Во тек се активности за враќање на телото на починатиот. Пред погребот треба да се изврши анализа за да се утврдат причините за смртта, а првичните претпоставки се дека станува збор за срцев удар.
АРМ во мисијата КФОР во Косово учествува со 50-тина припадници кои се ангажирани за обезбедување на воените бази на мисијата.
Во продолжение, соопштението на Генералштабот со деталите за овој трагичен настан:
Генералштабот на Армијата на Република Северна Македонија со жалење и длабоко сочувство кон фамилијата, ја известува јавноста дека денес (7ми јануари), во вечерните часови, (околу 18.15 часот), во болница во Приштина, Косово, ненадејно почина професионален војник со иницијали И.Ч на 44 годишна возраст, кој беше во состав на контингентот на Армијата на Република Северна Македонија во мисијата КФОР.
Имено професионалниот војник кој извршување должности во водот за обезбедување во командата на КФОР-запад во Пеќ, во текот на попладневните часови видно му се слошило по што веднаш откако бил приметен од присутните е пристапено кон пружање прва помош од страна на надлежната санитетска служба во состав на контингентот.
Веднаш со воен хеликоптер во придружба на воен медицински персонал бил упатен кон најблиската здравствена установа, во случајот болница во Приштина, каде по пристигнувањето од страна на персоналот се пристапило кон реанимација, но по кратко време се констатирала смрт за која како причина по првичните наоди е најверојатно од срцев удар.
Од страна на Генералштабот по добивање на првичните информации со преземање на сите потребни процедури, трагичната вест е соопштена на неговите најблиски и во моментот во координација со сите надлежни институции се преземаат сите неопходни мерки за пренесување на посмртните останки на нашиот припадник во неговото место на живеење.
По пристигањето на телото на нашиот починат мировник, погребот ќе биде со сите воени почести а во координација со неговата фамилија во време и место кое ќе биде одредено.