Рано насабајле, на автопатот Штип- Свети Николе, 25-годишен возач го урна рекордот на брзина фатен со дигиталните сообраќајни мерачи. Иако на тој дел од патот максимално дозволената брзина е до максимум 130 километри на час, младиот шофер возел 224 км/час.
Сообраќајните полицајци успеале да го сопрат и да му пишат казна. До Нова година, рекордот утврден со полициски мерачи беше 210 км/час.
Брзиот возач кој „летал“ од Штип кон Свети Николе е еден од вкупно 407 возачи кои се движеле над дозволената брзина и ги прекршил безбедносните норми за останатите учесници во сообраќајот, објави МВР.
Во текот на вчерашниот ден (06.01.2022) Министерството за внатрешни работи спроведе зајакната акциска контрола на територијата на Република Северна Македонија за санкционирање на возила кои се движат со брзина поголема од дозволената, при што санкционирани се 407 возачи. Од нив 86 возилa се движеле со брзина над 50 километри на час повеќе од дозволеното, а 26 возила се движеле со дури над 70 километри на час повеќе од дозволената брзина. Притоа, 119 возачи ја пречекориле брзината во населено место, а 288 надвор од населено место.
-Засилените акциски контроли продолжуваат и во наредните денови. Апелираме до сите учесници во сообраќајот да ги почитуваат сообраќајните правила и прописи и заеднички да придонесеме за побезбедни патишта, апелираат од МВР.