До изборот на новата Влада, министрите нема да доаѓаат во Собранието. Ќе се гласаат закони кои влегле во собраниска процедура пред оставката на премиерот Заев или закони предложени од пратеници.
Вакво мислење изгради пратеничката група на СДСМ, што е во целосна согласност со одлуката на спикерот Џафери – да не се одржи седницата за пратенички прашања.
До формирањето на новата Влада, Собранието може да расправа само по предлозите кои се влезени во процедура, зашто тие се надлежност на Собранието до чинот на гласање. За нив, овластен претставник може да биде и заменик министерот, кој има такви овластувања и надлежности. До формирањето нова Влада, нема да биде присутен ниту еден министер. Секако, Собранието може да работи по закони чии предлагачи се пратеници, изјави Јован Митрески од СДСМ.
Професорот по уставно право и политички систем Александар Спасеновски не се согласува. Објаснува дека министрите, иако се во оставка, останувааат на своите функции до изборот на нивните наследници.
Тие продолжуваат да ги извршуваат своите обврски, Владата може да одржува седници, да усвојува закони, да ги застапува во Собранието, па и да одговара на прашања од пратеници.
Вчера не се одржа закажаната седница за пратенички прашања. Според претседателот на Собранието Талат Џафери, тоа би било бесмислено бидејќи по констатираната оставка на премиерот, а со тоа и на целата Влада, министрите ги извршуваат своите должности само технички.
Иако Уставот и Деловникот немаат ваква изречна одредба, Џафери се повика на востановена пракса и на неодржување пратенички прашања за време на изборна кампања.
Соња Николовска