Апел до гостиварци за почитување на привремената забрана за пиење на водата од градскиот водовод што ја донесе Агенцијата за храна и ветеринарство (АХВ), порача градоначалникот на Гостивар, Валбон Лимани кој се огласи на социјалните мрежи, откако над 1.000 жители на градот се побараа лекарска помош поради стомачни проблеми, болки во желудникот, температура, омалаксаност, итн.
„Во однос на тврдењата дека дошло до мешање на канализациска и водоводна вода, информациите од ЈП „Комуналец“ укажуваат дека на посочената локација нема канализациска мрежа. Сепак, сите наводи се предмет на проверка и конечна оценка ќе дадат исклучиво надлежните институции. Во моментов нема официјален медицински или лабораториски доказ дека пријавените стомачни тегоби се предизвикани од водата од градскиот водовод. Причината мора да се утврди стручно и врз основа на релевантни анализи“, напиша Лимани на Фејсбук.
Тој повика на смиреност меѓу граѓаните, да не се шират непроверени информации за кои упатува на официјални извори.
С.Д.