Тргна од Владата, експресно помина во Собранието, веднаш беше потпишан од претседателот Пендаровски, но денеска заврши на Уставен суд. Антикорупциска го оспори специјалниот Закон за изградба без тендер на автопатите од Коридорите 8 и 10.
Бараат од уставните судии негово поништување и времена мерка – да се стопира примената на законот кој веќе е правосилен.
Антикорупционерите во Законот видоа висок ризик од корупција и судир на интереси, кажаа и дека е противуставен и е правен преседан бидејќи за стратешкиот партнер кој го одбра Владата – конзорциумот „Бехтел и Енка“ нема да важи домашното законодавство.
Рекоа дека има правни празнини кои оставаат простор за субјективизам, политичко влијание, тргување со моќ и дискреција при формирањето на Комитетот кој треба да преговара со инвеститорот.
Но, Владата нема да чека дали овој закон ќе падне на Уставен. Велат мора да постапуваат по него.
Собранието транспарентно го усвои законот и ја обврзува владата да постапи согласно меморандумот со конзорциумот „Бехтел и Енка“. Со овој закон не се склучува договор со компанијата, туку се задолжува Владата да започне преговори и да се изнајде најдобриот модел (технички и финансиски) за изградба на овие делници, велат од владата.
Инаку ниту пратениците ниту Претседателот не го послушаа мислењето на антикорупционерите.
Законот експресно го донесе Собранието по скратена постапка, на предлог на група пратеници, а Указот веднаш го потпиша Пендаровски.
Тој практично е реализација на Меморандумот на Владата со конзорциумот „Бехтел и Енка“ кој го избраа за стратешки инвеститор за изградба на автопатите Тетово – Гостивар- Букојчани, Требеништа – Струга – Ќафасан како и Прилеп – Битола.
Александра Филиповска