Сеуште не е започната ревизијата на неисплатените проекти од минатата го дина во Министерството за култура. Од Секторот за финансиска инспекција при Министерството за финансии, кој е задолжен од Владата да изврши контрола на неисплатените проекти, велат дека ќе постапат согласно Законот за финансиска инспекција откако ќе заврши започнатата истрага од Финансиската полиција.
Секторот е во комуникација со Финансиската полиција околу преземање на дејствија, имајќи ја предвид одредбата од Законот, согласно која, во случај на започнување истражна постапка од надлежен орган во субјектот на инспекцијата, финансискиот инспектор престанува со преземање на какви било дејствија со кои може да ја попречи истрагата, соопштуваат од финансии.
Од вчера Финансиската полиција врши увид на сите трансакции во Министерството за култура од последниве години, по индиции за злоупотреби нотирани во ревизорските извештаи од 2018 и 2019 година.
Нашите служби земаа дел од потребните материјали со што започна размената на податоци. Колку ќе трае целата истрага е неблагодарно да се каже зашто се работи за многу апликанти, вели директорот на финансиската полиција Арафат Муареми.
Доколку бидат утврдени незаконски дејства , предметот ќе биде даден во Јавното обвинителство на понатамошно постапување.
Во врска со најавената ревизија на ланските неисплатени проекти на Министерството за култура, реагираа културни работници и музичари од џез сцената. Според нив, одлуката да се врши ревизија е за поздрав и очекуваат дека ќе има евалуација, но сметаат дека најавата од ресорот Култура дека нема да се исплаќаат сретства додека траат контролите, не е добра одлука во овој период од годината кога се затвораат реализираните проекти од 2020. Тоа ќе се одрази врз егзистенцијата на слободните уметници и ќе ги претстави организациите како неодговорни пред партнерите, децидни се од независната сцена.
Сотир Трајков