На ниту еден гласач утре нема да му биде дозволено да влезе во гласачкото место ако претходно не ги дезифицира рацете и не носи маска. Заштитни ракавици не се задолжителни за гласачите. Пред влезот на гласачкото место ќе треба да се причека на растојание од 1,5 до 2 метри. Во просторијата се пуштаат онолку гласачи колку што има паравани за гласање.
При влегување гласачот прво ги дезинфицира рацете. Потоа ја подава личната карта, ја симнува накратко маската за да може да биде идентификуван и стои на дистанца од членовите на избирачкиот одбор. Гласа и на излегување повторно ги дезинфицира рацете.
Избирачките одбори внатре се должни да седат на растојание од метар до метар и пол, и постојано да носат заштитна маска и ракавици.
Просторијата во која ќе се гласа треба да биде со отворени прозорци или да се проветрува секој час. Во неа треба да има поставено средства за дезинфекција и корпа за отпадоци.
Овие избори се специфични и по тоа што за првпат се гласа во период од три дена, среде недела, а гласањето ќе трае два часа подолго. Избирачките места се отвораат во 7, а се затвораат во 21 часот.
Право на глас имаат еден милион 814 илјади двесте шеесет и три гласачи.Тие ќе гласаат на 3 480 избирачки места, а ќе можат да избираат помеѓу 4 коалиции и 11 партии.
Далиборка Демјанска