Младите лекари на специјализација се оставени без надомест за дежурствата, а немаат ниту регулирано здравствено осигурување.
Со отворено писмо до премиерот Ковачевски побараа и тој да се вклучи во решавање на нивниот проблем.
Лани тие се приклучија во Ковид-центрите низ државата за да помогнат среде пандемија, а тогаш Министерството за здравство започна со исплата на надоместоци за дежурства и здравствено осигурување на оваа категорија лекари.
Од пред четири месеци исплатата на дежурства им е прекината од страна на Фондот за здравствено осигурување и тоа без никакво образложение, реагираат младите лекари.
„Овој профил на кадар е најтешко да се продуцира и потребни се повеќе од 12 години за да се изгради еден лекар специјализант. истовремено, младите лекари најмасовно емигрираат од Македонија за да се стекнат со финансиска сигурност. Укинувањето на оваа мерка во пракса значи бркање на младиот лекар од државата како и негативен стимул, за студентите на медицина да ја продолжат својата едукација во рамки на државата. Апелираме до Премиерот и до сите надлежни институции да изнајдат решение за овој проблем кој потекнува од самоволието на поединци во ФЗОРСМ кои не ги согледуваат последиците од ваквата одлука, ставајќи ги личните интереси пред здравјето на граѓаните“ пишува во дел од од соопштението на Здружението на лекари и специјализанти.