Краткото, но силно невреме што го зафати Скопје предизвика значителни материјални штети и повреди.
Според податоците на Министерството за внатрешни работи, до 22 часот биле евидентирани 117 оштетени возила, 35 оштетени кровови, 189 паднати дрвја, седум оштетени семафори, пет пожари и 15 повредени лица.
Оштетени се и повеќе државни институции и објекти од витално значење, меѓу кои ОЈО ГОКК, комплексот „Вила Водно“, Министерството за финансии, Министерството за земјоделство, Јавното обвинителство, како и објектот „Нова Македонија“.
Поради протекување на кровот, на Меѓународниот аеродром Скопје излезот од државата беше во прекин околу час и половина.
Последици од невремето се пријавени и во повеќе градови низ земјата.
Во Куманово, Тетово, Велес се регистрирани оштетени возила и кровови, додека во Струмица силниот ветер предизвика пад на електрични столбови и прекин на електричната енергија во дел од населените места. Во Битола и Гостивар не се евидентирани поголеми штети, а во Транзитниот центар Табановце се оштетени дел од привремените објекти за сместување мигранти. Надлежните најавија дека точниот обем на штетата ќе биде утврден по официјалната проценка.