Две илјади жители помалку во Македонија во првите три месеци од 2026 година. Алармот е одамна вклучен, но природниот прираст никако да престане да тоне во негатива. Паѓа бројот на живородени деца, паѓа бројката на починати и бројката на склучени бракови, а единствено што се зголемува од година во година во Македонија е бројот на разводи.
Според деталниот извештај на Државниот завод за статистика (ДЗС), од 80 општини во Македонија, во дури 66 општини има негативен прираст, во една бројката е идентична, а во 13 имаме зголемен број на население.
Најголема негатива има Град Скопје, а потоа следува Битола. Од скопските општини најголема негатива има Кисела Вода, каде разликата во првото тримесечје за една година е 99 лица. Најголем прираст, пак, има во Општина Сарај, а потоа следуваат општините Студеничани и Арачиново.
Загрижувачки се бројките за помалите градови во источниот дел на државата како Виница, каде минусот е 48, во Гевгелија е 44, а во Делчево популацијата се намалила за 42 лица. Дебар е единствениот град во Македонија каде имаме идентична бројка на родени деца и починати лица и природниот прираст е нула.
Во првите три месеци од годинава родени се 3.380 деца, што е за 4,1 процент помалку споредено со лани, а во истиот број имаме и незначително помал број на починати лица.
Пресметките на статистика покажуваат дека природниот прираст за првите три месеци од годинава е во длабока негатива од 1.962 лица, што е за речиси 100 лица повеќе од минатата година, кога негативата изнесуваше 1.872 лица.
Ако се споредува бројот на склучени бракови по тримесечје годинава и лани, повторно имаме негативен процент, бидејќи се склучени 1.797 брака што е за речиси 3 проценти помалку. Единствено расте бројот на разводи, а според бројките на статистика во првите три месеци крај на заедницата одлучиле да стават 494 сопружници, што е за 6 проценти повеќе споредено со првото тримесечје во 2025 година. Во Тетово се склучени 137 брака на сметка на пет разводи и во Липково каде на 111 склчени брака има само два развода, а сосема разлика е ситуацијата во Гевгелија каде се склучиле четири брака, а има дури завршени 29 бракоразводни парници.
Огнен Чанчаревиќ