Наближувањето на изборната 2024-та ги мобилизира партиите. СДСМ е во процес на обединување на членството со вклучување на старите кадри.
Министерот Оливер Спасовски тврди дека во партијата не се почнати разговорите за идниот претседателски кандидат.
Не може да стане збор за некаков конфликт за прашањето за претседателските избори бидејќи не е отворено тоа прашање и за него се уште не се разговара во партијата. Кога ќе дојде време, ќе разговараме и низ дијалог ќе се утврди што е најдобро. За нас е важно европскиот фронт, таа опција што нуди извесност на државата и на граѓаните – да ја добие довербата од граѓаните, изјави Спасовски.
Но, последните активности на Спасовски и неговото издвоено мислење околу Законот за амнестија, за некои негови колеги во Владата е показател на претседателски амбиции. Министерот за правда Кренар Лога, кој во моментот е во Соединетите Американски Држави, оттаму порача:
Посакувам претстојната политичка кампања за претседателските избори да биде во најконструктивен можен дух, со постигнати резултати и отчетност од сите нас.
Пред неколку дена, СДСМ пласираше фотографии од состанок на стратешкиот тим. Вниманието повеќе го привлече сликата од текстот. Во тимот партиципираат премиерот, неговиот кабинет, двајцата секретари, министерот за внатрешни, советот за креирање политики, но и поранешниот лидер Зоран Заев. Мотото на средбата е: обединување.
Во истиот дух, се очекува формирање и на други партиски тимови со поранешни и актуелни функционери. По Игор Ивановски, во нив треба да се придружат Радмила Шеќеринска, Андреј Петров и други. Од сите се очекува заедничка работа во подготовката за парламентарните избори, чиј редовен термин е наредното лето.
Соња Николовска