Веќе втора недела стопирани се сите процеси во надлежност на Државниот испитен центар. Во неизвесност се 15.620 средношколци. Дали ваквата ситуација поради штрајкот на вработените во ДИЦ се поизвесно ја става државната матура под знак прашање.
„Јас не го знам интерниот правилник или календар за организација на Државниот испитен центар, меѓутоа факт е дека првиот екстерен испит е закажан за 27 мај , односно уште три седмици од одржувањето на првиот екстерен испит, така што ако штрајкот продолжи во поголем временски период може да се доведе под знак прашање целиот процес на одржување на државната матура. Меѓутоа сметам дека до тоа не треба да дојде и нема да дојде, вели претседателот на сојузот на средношколци“, изјави Лука Павиќевиќ.
Сојузот на средношколци со јавен апел до институциите, пред се до Министерството за финансии да ги прифатат барањата на Државниот испитен центар.
„Мене лично не ми е јасно зошто се создаде проблем од ова прашање кога станува збор за не повеќе од триесетина луѓе вработени во ДИЦ кои не бараат ништо повеќе само да им се изедначат платите со зголемување на минималната плата што беше изминатиов период направено. Не ми е јасно зошто Министерството за финансии не ги прифаќа нивните барања кога веќе енермно се зголемија платите на функционерите“, додава Павиќевиќ.
Вработените во ДИЦ реагираат дека и покрај тоа што правото на регрес им е предвидено во поединечниот колективен договор, веќе трета година Министерството за финансии само усно одговара дека не се на списокот на институции кои имаат право на регрес.
Според Министерството за финансии интенцијата на Владата е трудот на вработените во јавната администрација преку платата да биде валоризиран преку воедначено, системско решение кое е фискално одржливо на долг рок и ќе се темели на прецизно дефинирани критериуми. Веќе се преземаат активности и се работи на нов Закон за административни службеници и на подготовка на Општ колективен договор за јавнот сектор, за кој веќе се разговара со социјалните партнери во рамки на Економско социјалниот совет,стои во дописот на Министерството за финансии.
Нина Стефанова