Судскиот совет денеска повторно ја одложи седницата на која требаше да се избере нов претседател по разрешувањето на досегашната претседателка Весна Дамева. Кога ќе се одржи седницата од Судски совет не соопштија, а како образложение додадоа само дека ќе се обидат сами одвнатре да ги решат несогласувањата, како што ги повикале од Врховен. Разрешувањето на Дамева и изборот на нов претседател се главните отворени прашања за кои има длабоки поделби. Неофицијално, во Судскиот совет сѐ уште нема мнозинство од 8 гласови за избор на нов претседател. Наместо седница, тие денеска ќе одржат колегиум.
Дамева беше разрешена во средата, во тензична атмосфера и според мислење на експерти, во незаконска постапка. Нејзиното разрешување го иницира заменикот Селим Адеми, предлог кој по неколку часа тензии и расправии, доби поддршка од 7 од 13 члена на Советот.
Првично беше најавено дека наследникот на Дамева ќе биде избран ден по нејзиното разрешување, но заменик-претседателот на Советот Адеми во четвртокот побара одлагање на изборот за неколку дена, поради, како што рече, важноста на прашањето како што е избор на нов претседател, за кое би било добро присуство на сите 13 членови.
За разрешувањето на Дамева, но и за општата состојба во судството, реагираа и претседателот Стево Пендаровски, Министерството за правда, пратеници во Собранието, ДКСК, како и правни експерти. Разрешувањето на Дамева за експертите во правосудството претствува непочитување на процедурата и Деловникот.
