Поради силно невреме проследено со нагло заладување, олујни ветрови, дожд и снег, повеќе земји од регионот издадоа метеоролошки предупредувања и активираа системи за итно известување.
Во Хрватска е издадено црвено предупредување за регионот на Загреб поради северни и североисточни ветрови со налети над 90 км/ч, со ризик од паѓање дрвја, прекини во струја и сообраќај. Во сила е ѝ жолто предупредување за обилни врнежи, снег и лапавица, што го зголемува ризикот од поплави и лизгави патишта. Веќе се пријавени паднати дрвја во Загреб и повредени лица во Риека, а пожарникарите интервенирале повеќепати.
Во Србија, РХМЗ предупредува на обилни врнежи од утре до недела, со 30 до 60 литри дожд на метар квадратен и снег на планините до 30 сантиметри. Се очекува нагло заладување и проширување на врнежите низ целата земја.
Црвено предупредување е издадено и во северна Словенија, каде налетите на ветер може да достигнат до 140 км/ч, со опасност од оштетувања и прекини во снабдувањето со електрична енергија.
Во Босна и Херцеговина врнежи од дожд веќе зафатија дел од земјата, а на повисоките места паѓа снег. Се очекува променливо време со ветер и дополнително заладување.
Надлежните апелираат до граѓаните да бидат внимателни, да го ограничат движењето и да ги следат препораките, особено во погодените подрачја.
Т.Д.