Гласот кој со децении го слушавме во емисијата „Диско селектор“ на брановите на Македонското радио, тој енергичен глас на доајенот на радиоводителството, музички новинар и диџеј, Драган Б. Костиќ, стивна на 20 декември минатата година. Но, остануваат сеќавањата за човекот чии радио емисии, меѓу кои се и „Кавервил“, „Чартфајл“ и „Заборави ако можеш“, за генерации слушатели значеа информација, едукација и забава во полето на домашната и странската популарна музика. Тој милозвучен глас нè водеше во светот по она за кое како деца копнеевме, кажа водителот Антонио Димитриевски на комеморацијата по повод смртта на Драган Б. Костиќ.
„Кога бев детенце, со транзисторот на уво за да слушам „Диско селектор“. Да ги слушам најубавите песни, да го слушам оној милозвучен глас кој нè водеше во светот по она за кое како деца копнеевме. И ние да бидеме еден ден таму некаде на сцената со музичарите“, рече Димитриевски.
Со Драган „Титаник“ заживеал, кажа неговиот пријател и колега, поранешниот диџеј Бранислав Димитриевиќ. Тој со Костиќ девет години заедно пуштале музика во диско клубот „Турист“, на покана на Григор Копров.
„Јас кога влегов во клубот велам „Што е ова?“ – Ова е „Титаник“ кој тоне. Драган вели „Не се секирај, јас сум до тебе“. Некаде тоа беше септември, така се почнуваше. И некаде во октомври беше преполно диското“, раскажа Бранислав Димитриевиќ, поранешен диџеј во „Турист“.
Драган Б. Костиќ одигра важна улога и како промотор на македонските бендови од 80-тите години на 20-от век. Не ретко присуствувал на нивни проби, а една пејачот Дарио Панковски ќе ја памети цел живот.
„Јас во мојата 45-годишна кариера двапати сум има најголема трема во животот. Не се концертите, не се било какви концерти. Првиот пат беше кога дојде Драган да нè слушне во гимназијата „Никола Карев“, – триото „Бонтон“ во 1980 година. Јас не знаев како се викам. Се тресев од страв, од трема. Вториот пат е сега“, изјави пејачот Дарио Панковски.
По секој говор аплауз и отворена книга на жалост во која се потпишаа присутните на комеморацијата. Драган Б. Костиќ почина на 75 годишна возраст, по кратко боледување.
Сотир Трајков