Земјоделските посеви во дел од Пелагонија веќе петти ден се под вода. Утрово, ниските температури ги замрзнаа површините под жито и други култури. Најкритична е состојбата во пограничната зона, каде што водата делумно се повлекува, но сè уште има поплавени површини.
Поплавите се предизвикани од излевање на реките и од високите подземни води. Жителите реагираат дека каналите не се целосно исчистени. Од јавното водостопанско претпријатие „Битолско Поле“, како главен проблем ги посочуваат нерегулираните речни корита со поделени надлежности меѓу институциите, додека примарната каналска мрежа, според нив, е во добра состојба.
Екипите на претпријатието и денеска се излезени на терен и ги чистат каналите, со апел до граѓаните да не фрлаат отпад кој го отежнува протокот на водата.