Турскиот претседател Реџеп Таип Ердоган денеска учествуваше на видеоконференција со лидерите на „Коалицијата на подготвените“ за мир меѓу Русија и Украина, објави прес-службата на турското претседателство.
„Претседателот Ердоган рече дека директни разговори може да се одржат во Истанбул и дека Турција е во контакт со Русија и Украина за ова прашање“, рече Бурханетин Дуран, директор на Дирекцијата за комуникации.
Ердоган бил придружуван од турскиот потпретседател Џевдет Јилмаз и министерот за надворешни работи Хакан Фидан.
Турскиот лидер ги увери учесниците од 35-те земји дека Анкара ќе продолжи со дипломатските напори за олеснување на патот кон директни разговори што би можеле да доведат до траен и праведен мир што е можно поскоро.
На состанокот, Ердоган изрази мислење дека склучувањето договор за прекин на нападите, прво врз енергетската и пристанишната инфраструктура, би можело да доведе до поволни услови за последователно преговарање за сеопфатен мировен договор меѓу страните.