Во вториот круг од локалните избори, кој се одржа во 33 општини, се евидентирани вкупно 19.287 неважечки гласачки ливчиња, што претставува околу 5,6 отсто од сите употребени ливчиња.
Од вкупно 345.525 излезени гласачи, овие ливчиња не биле валидни, според официјалните податоци од Државната изборна комисија.
Во Град Скопје, од 167.575 гласачи, 10.528 ливчиња биле неважечки, што изнесува 6,3 отсто од вкупниот број, односно речиси секое шеснаесетто ливче било невалидно.
Излезноста во Скопје во вториот круг изнесувала 35,33 проценти, додека на национално ниво излезноста е 47,16 проценти.
За споредба, во првиот изборен круг одржан на 19 октомври, од 885.085 гласачи, 53.724 ливчиња беа неважечки, односно 6,1 отсто.
Во првиот круг за градоначалник на Град Скопје беа евидентирани 12.359 неважечки ливчиња, а излезноста изнесуваше 49,04 проценти.
Во најмалку девет општини бројот на неважечки ливчиња е поголем од разликата меѓу двајцата кандидати што беа во вториот круг.
Така на пример во скопската Општина Карпош каде победи кандидатот на ВМРО-ДПМНЕ и коалицијата, Сотир Лукровски, а негов противкандидат беше од коалицијата „Искуство за успех“, Стевчо Јакимовски разликата во гласови меѓу нив е 1.134 гласа, а бројот на неважечките ливчиња е 2.834.
Во општина Куманово вкупниот број на неважечки ливчиња е 1.324, а разликата во гласови кои ги освоил Максим Димитриевски од ЗНАМ е 1.331 пред Горан Стојковски независен кандидат за градоначалник.