Карате клубот „Макпетрол“ се закити со десет признанија на вчерашната манифестација за прогласување на најдобрите во карате спортот за 2024 година.
Петар Заборски од „Макпетрол“ е прогласен за најдобар каратист на Македонија за 2024 година во борби, додека второто место му припадна на неговиот тимски колега Петар Спасеновски, а трет беше Емил Павлов од Штип.
Во сениорска конкуренција кај каратистките во борби, Викторија Јовановска од Макпетрол беше трета, зад двете натпреварувачки на Олимпик, Михаела Мишовска и Вероника Костовска.
Во конкуренција на каратисти до 21 година целосна доминација на Макпетрол, бидејќи Стефан Стојановиќ беше најдобар, втор беше Витомир Трајковски, а третото место му припадна на Данило Божовиќ.
Јована Мицовска пак е најдобра во борби кај каратистките во конкуренција до 21 година.
Карате клубот „Макпетрол“ беше прогласен за најдобар младински клуб, а Петар Заборски трета година по ред го доби признанието за најдобар тренер во младинска конкуренција.
„Макпетрол“ освои и признание во кадетска конкуренција во кати, каде Никита Лековски го освои второто место.