Електронски документи наместо старите папки со хартија. Дигиталната инфраструктура и поврзувањето не се само предуслов за управување со јавните ресурси и финансии туку и клучен фактор за економска стабилност и напредок а степенот на отпорност кон надворешни влијанија и кризи е правопропорционален со степенот на дигитализација на државата. Ова се дел од заклучоците на денешната конференција на која се дебатираше за предностите на централизиран дигитален систем во државната администрација.
Со дигитализацијата и поврзување на државните институции може да се спроведе ефикасна борба против корупцијата, смета министерот за дигитална трансформација Стефан Андоновски.
Приоритет на Владата е што повеќе институции да се приклучат на платформата за интероперабилност кој во моментов не се користи доволно.
УЈП ќе ги автоматизира и дигитализира процесите за да може поефикасно да ги собира даноците и да открие евентуално затајување.
Обучен кадар во државата има, но има и конкуренција на пазарот па затоа државата мора да вложува за да го искористи нивниот потенцијал но и да создаде нов.
Централизиран дигитален систем ќе биде од исклучителна корист за граѓаните кои ќе имаат полесен пристап до услугите на државната администрација, заклучија експертите на конференцијата.
Огнен Чанчаревиќ