Кризен штаб, специјална комисија, дежурни обвинители и сите полицајци на терен. Истражителите и полицијата од утре дежураат и ќе ловат изборните нерегуларности. Во следење на изборите се вклучуваат и бирото за јавна безбедност како и агенцијата за национална безбедност. Казните се познати од над три години до максимални ако се предизвика и насилство при гласањето. Најмалку три години затвор кој ќе уништи ливчиња или гласачка кутија, порачуваат истражителите.
МВР и обвинителство се здружија во кризен штаб. Утре ќе ловат прекршувања на изборниот процес, а сите криминалци кои ќе се осудат да сторат кривични дела за кои е запретана казна и над 3 години ќе бидат процесуирани по итна постапка.
- „Од страна на директорот на БЈБ беа презентирани информации во врска со Оперативната акција Претседателски и парламентарни избори 2024 година и во таа насока посочи дека од страна на Оперативниот штаб и сите надлежни организациски единици се преземени сите потребни мерки и активности врз основа на претходно изготвен план и притоа не се констатирани никакви позначајни проблеми. Од страна на АНБ се преземаат организирани и координирани мерки за прибирање на сознанија за евентуални изборни нерегуларности, а во насока на безбедно спроведување на изборите,“ информираат од МВР.
Молкот барем засега важи и за прекршителите, барем така се огласија од обвинителството и потврдија дека до сега не е регистрирано ниту едно прекршување на кривичниот законик, но од утре обвинителите стапуваат на дежурство.
- „Републичкиот јавен обвинител и претставниците од обвинителствата низ државата информираа дека е формирана Комисија за изборни нерегуларности во рамки на обвинителството, определени се зајакнати дежурства за изборниот ден за покривање на целото подрачје на државата и со будно внимание ќе се следи процесот и навремено ќе се известува за сите настани и активности кои се од интерес на јавноста, а поврзани со спроведувањето на изборите,“ потврдија од Јавно Обвинителство.
Кршење кутии, уништување гласачки ливчиња попречување и влијание при гласањето или поткуп на гласачи, обвинителите имаат на располагање кривични дела кај е предвидена затворска казна од над три години, а и можност за гонење до максимални 20 години затвор ако е употребна сила, оружје, предизвикана смрт.
Павле Беловски