Хорхе Мартин стигна до победата на трката за Големата награда на Португалија во Мото ГП шампионатот. Имаше неколку излетувања, а посебно импресионираше дебитантот Педро Акоста, кој стигна до првиот подиум во кратката кариера во најсилната класа.
Мартин денеска доминираше на патеката во Портимао и заслужено дојде до триумфот. Зад него финишираше освојувачот на пол-позицијата Енеа Бастијанини и тоа откако Маверик Вињалес, кој беше втор, излета во последниот круг од трката поради проблеми со менувачот. Тоа му овозможи на дебитантот Педро Акоста да го освои третото место и да се искачи на подиумот на својата втора трка во најсилната класа.
На три круга до крајот актуелниот бранител на титулата Франческо Бањаја имаше контакт со шесткратниот првак Марк Маркез, па трката заврши за Италијанецот, а Шпанецот финишираше на 16-тото место.
Чевртото место го освои Бред Биндер, потоа следуваат Џек Милер, Марко Бецеки, Фабио Квартараро, Алеиш Еспаргаро, Мигел Оливеира и Фабио ди Џанантонио.
Мартин сега го презема водството во генералниот поредок со 60 бодови, Биндер е втор со 42, додека потоа следуваат Бастијанини и Бањаја со 39, односно 37 бода.
Следната трка е за Големата награда на САД во Остин на 14 април.