Заврши минута пред полноќ, гласовите беа пребројани откако опозицијата ја напушти салата по последната реплика и по исцрпениот дневен ред за говорници. Со 62 гласа „За“, беа разрешени министерот за здравство Фатмир Меџити и министерот за информатичко општество и администрација Азир Алиу.
Владеачкото мнозинство беше потврдено, министрите од Алијанса на Таравари станаа поранешни, а денот беше исполнет со критики и навреди и главно со опозициски обоени говори.
Владеачките ги обвинуваа разрешените министри дека се министри на ВМРО-ДПМНЕ, а опозицијата напаѓаше со тврдењето дека владата недемократски цени слобода на избор во политика како што го направиле Меџити и Азири и смената се прави по налог на ДУИ и со послушништво на СДСМ.
Во својот говор, министерот Азири рече дека утрово на денот на разрешување добил кратка покана дека Собранието ќе расправа за негова смена без да му ги посочи грешките зошто треба да замине од Илинденска.
Пред да нареди колку процеси за дигитализација во администрацијата се спроведени во неговиот 11-месечен министерски мандат, Алиу директно го обвини Груби за мешање во кадровската политика на министерството додека СДСМ не било заинтересирано за пополнувањето на сопствените веќе договорени директорски позиции.
-Од денешна гледна точка гледам зошто одеше толку тешко назначувањето. Артан Груби со ДУИ-стите одлучувале кој е тој што ги исполнува критериумите и врз основа на сопствени проценки на перформанси ги менувале директорите. Јас ги гледав ДУИ-стите во Алијансата како заедно со оние кои се ДУИ оригинал ги прават опструкциите, изјави Азир Алиу, во обраќањето пред Собранието.
Денот заврши, а новиот почна со тврдење на екс премиерот Ковачевски. По добиените 62 гласа и мнозинство на работ, тој од партиското седиште оцени дека Европскиот фронт постои, постојат партии кои се залагаат за евро-интеграциите. Едниот разрешен министер доби висока оценка од него како премиер, другиот квалификации блиски до навреда.
-Со министерот Азир Алиу имавме одлична соработка, се работи за врвен професионалец во својата област. Само ако отидете на Google Scholar (интернет пребарувач за научни трудови) и ги видите неговите научни трудови како професор што ги правел ќе видите дека се работи за исклучително квалитетен академски и професорски кадар, рече Ковачевски.
-Има уште еден кадар, министер за здравство којшто имаше малку поинаков начин на функционирање. Тој повеќе делуваше како „подизведувач“ на г-динот Таравари меѓутоа сигурно има и свои предности. И како доктор и како менаџер во Министерството за здравство. Меѓутоа влечеше одредени потези кои кадровски кои никој не ги одобруваше, дури ни тој не се слагаше. Например разрешувањето на д-р. Милена Стевановиќ (директорка на Инфективната клиника) со изговор дека не знаела англиски јазик, а таа студирала на Кембриџ, го оцени Меџити доскорешниот премиер Ковачевски.
Двајцата разрешени од таборот на Таравари преку Фејсбук го обвинија Груби дека во состојба на вознемиреност им упатува закани и заканувачки му порачаа дека со започнатите промени ќе има затвори за одговорните.
-Откако ја разреши АА од Владата, ни порачува „спијте мирно“ дека Али Ахмети ќе се погрижи за се… Артан…престани со заканите, одмори неколку дена ако ти помогне тоа и не ја разгорувај ситуацијата. Знаеме дека ти е крајот, но барем покажи дека си маж на крајот! И…отворете го календарот…видете 8 мај! Затвори…многу, многу блиску! ПРОМЕНАТА ПОЧНА!, напишаа двајцата разрешени министри во статус на Фб.
Таравари немаше обраќање, а неговите противници се собираа на централно собрание на Алијанса предводени од екс лидерот Зијадин Села. За Ковачевски, заминувањето на Таравари не е клучно за иднината на државата.
-Јас не сметам дека Таравари е толку судбоносен за иднината на државата. Сепак се работи за политичар од Гостивар кој е успешен доктор, кој прави свои политички калкулации и еквилибристики. Иднината на државата не може да зависи од еден човек или од една политичка партија туку станува збор за општествен процес, порача лидерот на СДСМ.
Техничката влада веќе во втората седмица остана без двајца министри, а ќе се пополнува во понеделник.
Миомир Серафиновиќ