Нема напредок во владеењето на правото. Пораката од Европската унија е кратка и јасна, а недостатоците се констатирани. Борбата против корупцијата е клучна за напредокот на Македонија кон Унијата, а заложбите засега се декларативни наместо спроведени во пракса.
Евроамбасадорот Гир порачува дека е евидентно отсуството на независен систем на владеење на правото. Корупцијата ја гледа насекаде – од најниско до највисоко ниво.
„Дали е тоа некаква јавна услуга, дали е во училиштата и во образованието, во здравството, на работното место, во секторот животна средина или во владеењето. И отсуството на ефективен и независен систем на владеење на правото ги остава злоупотребите неказнети, правата не се почитувани, нееднаквоста расте, конкуренцијата за иновации застанува и најлошо од сѐ – граѓаните се сѐ поцинични и поотпорни кон институциите и не гледаат можност за промена“ порачува Дејвид Гир, амбасадор на ЕУ во Македонија.
Претседателот Пендаровски во обраќање на пленарната сесија на тема „Национална конвенција за ЕУ: Темелни општествени вредности за европска иднина“ порачува – „онаму каде што не владее правото, владеат парите“.
Признава дека Македонија нема доволно направено за напредок на тоа поле, а доказ за тоа е што четвртина од граѓаните го зборуваат јазикот на корупцијата.
„И притоа не станува збор само за големи туку и за навидум мали и занемарливи суми на пари. Меѓутоа корупцијата е корупција независно дали станува збор за петстотини денари или петстотини илјади денари. За жал многу врати се отвораат и многу услуги стануваат достапни за оние кои го разбираат овој јазик на корупцијата. За оваа загрижувачка состојба придонесува и нерешителноста на поединци во надлежните институции да поведуваат постапки против оние за кои постојат основи на сомневање, но кои имаат статус на недопирливи во општеството. Се стекнува впечаток дека САД и ЕУ се поревносни борци против корупцијата кај нас, од некои наши институции и поединци во нив“ смета Стево Пендаровски, претседател на РС. Македонија.
Странските санкции не се доволни, корупцијата е начин на живот и преминува во менталитет. Истрагите и процесите за висока корупција се бавни и неизвесни, смета претседателот Пендаровски.
Дека нема напредок во областа на борбата против корупцијата е констатирано и укажано во Извештајот на ЕУ, а евроамбасадорот Гир истиот го опиша како „чесен, отворен, но фер“.
Петар Догов