Штефан Крафт ја продолжи победничката серија во Светскиот куп во ски-скокови. Австриецот денеска повторно славеше во Лилехамер, Норвешка, па стигна до перфектни четири победи од четири натпреварувања на стартот од сезоната.
Крафт денеска во двата скока освои вкупно 318,2 поени, а оствари скокови од 134 и 141,5 метри на големата скокалница во Лилехамер. Второто место, исто како и вчера на нормалната скокалница, го освои Андреас Велингер од Германија со 5,9 бодови помалку од победникот , а трет беше Јан Херл од Австрија.
Крафт очекувано е лидер во генералниот поредок со максимални 400 бодови, Велингер е втор со 270, додека на третата позиција е Пиус Пашке со 206 бодови.
Натпреварувачите, следниот викенд се селат во Германија, каде има два натпревари во Клингентал.
