Двојна победа на Хорхе Мартин денеска во Мизано, откако ја освои пол-позицијата за утрешната трка за Големата награда на Сан Марино, а потоа и славеше на спринт трката.
Мартин во квалификациите имаше најбрз круг со време од 1 минута, 30 секунди и 787 илјадитинки со што постави и нов рекорд на патеката „Марко Симончели“. Зад него ќе тргне Марко Бецеки, а првиот стартен ред со мотоцикли на Дукати го комплетира актуелниот светски шампион Франческо Бањаја, кој денеска имаше одличен настап и покрај тешкиот пад во Барселона минатиот викенд.
На спринт трката подиумот беше идентичен како и во квалификациите. Славеше Мартин пред Бецеки и Бањаја, кој во финишот мораше да се брани од Дани Педроса од КТМ. На петтото место финишираше Бред Биндер, а потоа следуваат Маверик Вињалес, Лука Марини и Алеиш Еспаргаро.
Во генералниот поред, Бањаја останува лидер со 267 бодови, Мартин е втор со 222, додека Бецеки е трет со 198 бодови.
Утре трката за големата награда на Сан Марино стартува во 14 часот.