Репортерот на ТВ Телма од пред Кривичниот суд Симона Петровска јавува дека околу 16:00 часот од зградата на судот со лисици на раце е изнесен Владимир Здравев кој е осомничен во истрагата ФЕНИКС за злоупотреби при проектот „Скопје 2014-та“. Здравев е поранешен претседавач на Советот на општина Центар.
Од судот за Телма потврдија дека на двајца осомничени (В.З. и Љ.Б.) од судија на претходна постапка им е определен притвор. За трет осомничен (Т.Д.) е определен куќен притвор. Најавени се дека уште тројца осомничени ќе бидат изведени пред судија за претходна постапка.
Вчера доцна попладне отпочна истрагата ФЕНИКС за злоупотреби и перење пари преку проектот „Скопје 2014-та“. Уапсен е и Владимир Тодоровиќ-Тинекс кој е поранешен градоначалник на Центар. Меѓу осомничените е Никола Груевски како и министрите од неговиот владин кабинет во периодот меѓу 2008-ма и 2015-та, Зоран Ставревски и Елизабета Канческа Милеска.