Советот на јавните обвинители, Јавното обвинителство и Здружението на јавните обвинители изразија сериозна загриженост поради тоа што Уставниот суд сè уште не постапил по иницијативите за оценување на уставноста на законските измени со кои по третпат се намалуваат коефициентите за пресметка на платите на јавните обвинители.
Според нив, ваквата состојба создава нерамноправен третман меѓу јавните обвинители и судиите и ја нарушува уставно загарантираната самостојност на Јавното обвинителство. Тие посочуваат дека финансиската независност е клучна гаранција за независно и непристрасно извршување на обвинителската функција.
Обвинителските институции очекуваат Уставниот суд навремено да донесе одлука и да обезбеди заштита на принципите на владеење на правото и поделба на власта. Предупредуваат дека продолжувањето на ваквата состојба може да создаде ризик од влијание врз независноста на обвинителството и неговата позиција во правниот систем.