Плати блиски до државниот минимум и магистри со приходи од 400 евра месечно. Синдикалците од МАНУ најавуваат штрајк за 9 февруари.
Станува збор за незадоволните вработени во Секретаријатот и стручните единици.
Одлуката се крчка подолго време, откако ниту повеќемесечните преговори за зголемување на платите не дале никаков резултат.
„Причина за штрајкот се недостоинствено ниските плати на вработените во Секретаријатот и стручните единици на МАНУ, кои се далеку под просечната плата во РС Македонија, односно малку над минималната плата. Ова е првпат во 56-годишното постоење на МАНУ, вработените во Секретаријатот и стручните единици да стапат во штрајк“ известија од Сојузот на синдикатите на Македонија.
Највисоката самостојна научна и уметничка институција во државата се грижи само за академиците, а ги запоставува другите вработени – вака критикуваат од синдикалната организација.
Додека државниот просек брои нешто над 33 илјади денари просечна нето-плата во земјава, 22.500 денари е просекот во засегнтите служби во МАНУ.
„Револтот на вработените во Секретаријатот и стручните служби на МАНУ е уште поголем ако се земе предвид огромната разлика во нивните плати споредено со платите на академиците. И кога пред извесно време академиците добиле зголемување на приходите, немало ништо и за другите служби на МАНУ.“
Телма се обиде да добие став и од претседателот на МАНУ, академик Љупчо Коцарев, за новонастанатата состојба во институцијата – но, одговор не добивме.
Петар Догов